MDG vil arbeide for gode fagmiljø ved alle sjukehus, legesenter og rehabiliteringssenter i fylket. Pasientane ved lokalsjukehus er mer nøgde med behandlinga, og fagleg rekruttering er ikkje vanskelegare ved små enn ved store sjukehus. Beredskapsmessig er det viktig å ha mange sjukehus å fordele pasientar på.
Transport av pasientar og pårørande er svært ressurskrevande og vanskeleg i vårt oppdelte fylke. Å avgrense transportbehovet er særleg viktig for fødande. Ein må sikre god oppfølging for alle fødande i heile fylket. Då er det ein føresetnad at eksisterande fødeavdelingar blir ført vidare.
Møre og Romsdal må gå i front og innleie eit samarbeid med arbeidstakar- og arbeidsgivarorganisasjoner for å finne løysingar som sikrar betre vilkår for dei tilsette med låg løn i omsorgssektoren, og betre høve til å slå saman stillingsbrøkar.
Miljøpartiet Dei Grøne i Møre og Romsdal vil:
● legge ned helseføretaka og overføre ansvaret for sjukehusa tilbake til fylkeskommunen
● la fagmiljøa ta tilbake kontrollen over sjukehusa ved å innføre stadleg leiing
● føre vidare heildøgns akuttkirurgi ved alle sjukehus, også i helgene
● føre vidare ei god ambulanse- og transportteneste for pasientar i alle delar av fylket
● halde på Muritunet, Aure rehabiliteringssenter og Mork rehabiliteringssenter i rehabiliteringsarbeidet
● styrke helsestasjonane og jobbe for at alle kommuner har tilbod om helsestasjon for ungdom i aldersgruppa 13 til 20 år
● styrke helse-, pleie- og omsorgssektoren med fleire stillingar
● satse på førebyggande helsearbeid for alle aldersgrupper
● stoppe nedbygginga av sengeplassar innan psykisk helsevern
● ha miljøvennlege og lokale løysingar for varer og tenester til sjukehusa
● betre avfallssortering på helseinstitusjonar
● sikre sunn, god og variert mat ved sjukehusa og rehabiliteringsinstitusjonane i fylket
● at tannhelsetenesta skal vere gratis til fylte 25 år. Deretter bør utgiftene inkluderast i eigenandelsordninga i folketrygda
● arbeide for at helse- og omsorgsinstitusjonar har tilknyting til grøntareal for rekreasjon og rehabilitering